जापानले कामदारहरूको अभावलाई सम्बोधन गर्न १ अप्रिल २०१९ बाट नयाँ कानूनलाई अनुमोदन गरी विदेशी कामदार भित्र्याइरहेको छ । जापानले विशेष गरी भियतनाम, चीन, फिलिपिन्स, इन्डोनेसिया, कम्बोडिया, थाइल्याण्ड, नेपाल लगायत अन्य देशबाट कामदार लिइरहेको छ ।
कामदार छनोटको लागि तोकिएको मापदण्ड बमोजिम जापान जान चाहने कामदारले जापानी भाषा र सम्बन्धित काम गर्ने क्षेत्रको सीपको परीक्षा दिएर पास गर्नुपर्ने हुन्छ । प्रशिक्षार्थी कामदारको रूपमा जापान गएर तीन वर्षभन्दा माथि काम गरेको व्यक्तिहरूको हकमा भने तोकुतेई गिनोउ भिसामा परिवर्तन गर्न कुनै परीक्षा उत्तीर्ण गर्नु आवश्यक छैन ।
अहिले नयाँ तोकुतेई गिनोउ भिसा प्रणाली अन्तर्गत नेपालसहित अन्य मुलुकबाट २२ हजार ५६७ जना जापान गएर काम गरिरहेका छन् । यीमध्ये धेरै कामदार पठाउने मुलुक भियतनाम हो । त्यहाँबाट १४ हजार १४७ जना जापान पुगेका छन् । यो सूचीमा नेपाल आठौं स्थानमा रहेको छ । नेपालबाट १८२ जना यसरी जापान पुगेका छन् ।
