पर्वत वेलफेयर सोसाइटी यूकेद्वारा गृह जिल्ला पर्वतका जेहेन्दार, गरिब तथा अल्पसंख्यक बालबालिका हरुलाई पोशाक, तथा शैक्षिक सामाग्री वितरण गरेको छ । वेलफेयर सोसाइटीको प्रतिनिधित्व गर्दै बरिस्ठ उपाध्यक्ष दधी आचार्य यतिबेला विद्यार्थी भेट्न र सहयोग गर्न पर्वतका गाउँगाउँ पुगेका छन ।
पर्वतको उत्तरी क्षेत्र जलजला गाउँपालिकाको फर्से धाइरिङ मावि, कृष्णभवन धर्म मावि, शालिजा मावि र ग्रामप्रकाश मावि लेखफाँटका ४४ जना र दक्षिणको विहादी गाउँपालिकाका विभिन्न विद्यालयका ११५ जना जेहान्दार विद्यार्थीलाई पोशाक, झोला र कापीकलम वितरण गरिएको हो ।
सामाग्री हस्तान्तरणमा सहभागी गण्डकी प्रदेश सभा सदस्य माननीय रेखा गुरुङले विदेशमा रहे पनि जन्मे हुर्केको गाउँमा संधै मानवीय तथा सामाजिक सहयोगका कार्यहरु गरिरहेको वेलफेयर सोसाइटीप्रति प्रसंसा र आभार व्यक्त गरिन । कार्यक्रममा जलजला गाउँपालिकाका अध्यक्ष राजुप्रसाद आचार्य, बिहादी गाउँपालिका अध्यक्ष परविन गुरुङ लगायत बुद्धिजीवी स्थानीयहरुको उपस्थिति थियो ।
सोसाइटीका उपाध्यक्ष आचार्यले विद्यालयले छनोट गरेका विद्यार्थीलाई सहयोग वितरण गरिएको बताउँदै आगामी दिनमा पनि सहयोगलाई निरन्तरता दिने बताए ।
पर्वत वेलफेयर सोसाइटी यूकेकी अध्यक्ष अप्सरा गुरुङले च्यारिटी कार्यक्रमको लक्ष्यअनुसार नै विपन्न गृह जिल्लाका बालबालिकालाई सहयोग वितरण गरिएको जानकारी दिइन् । अध्यक्ष गुरुङले समाजिक सेवा तथा सहयोगलाई संधै आत्मसात गर्दै अंगाडी बढ्ने र चरणबद्ध रुपमा बाँकी विद्यार्थीहरुलाई सहयोग हस्तान्तरण गरिने बताइन् ।
सोसाइटीले गत जुलाई पहिलो साता बेलायतमा च्यारिटी कार्यक्रम गरी झण्डै २० लाख रुपैया जुटाएको थियो । सन् २००३ मा स्थापना भएको संस्थाले दृष्टिविहिन विद्यार्थीलाई अक्षय कोषसहित शिक्षा, स्वास्थ्य, विपत्ति तथा बाढीपहिरोबाट विस्थापित लगायत विभिन्न क्षेत्रमा सहयोग गर्दै आएको छ ।
