पोखरा/ पोखरा महानगरले गएको वर्ष विकासको लागि छुट्टयाइएको बजेटको आधा मात्रै खर्च गरेको छ ।
आर्थिक वर्ष २०७७/०७८ मा महानगरले पूँजीगततर्फ २ अर्ब ९८ करोड ८८ लाख रुपैयाँ विनियोजन गरेको थियो । त्योमध्ये ५० दशमलव ५ प्रतिशत मात्रै बजेट खर्च भएको बिहीबार आयोजित समीक्षा कार्यक्रममा जानकारी दिइयो । महानगरले चालुतर्फ भने ८७ प्रतिशत बजेट खर्च भएको जनाएको छ । महानगरका वित्त महाशाखाका निर्देशक जयराम पौडेलले कोभिड महामारीका कारण लक्ष्य अनुसारको बजेट खर्च नभएको जिकिर गरे । उनले कूल ५ अर्ब ५१ करोड ८२ लाख ५३ हजारको बजेटमध्ये ३ अर्व, ६८ करोड, ८१ लाख २५ हजार रुपैयाँ खर्च भएको बताए ।
बजेट खर्चको अनुपातमा सबैभन्दा धेरै (९१.३७ प्रतिशत) शिक्षा महाशाखाले खर्च गरेको छ । महाशाखाले कूल १ अर्ब ३४ करोड ८५ लाख बजेटमध्ये १ अर्ब २३ करोड २१ लाख ८३ हजार रकम खर्च गरेको हो । त्यस्तै सबैभन्दा कम सामाजिक विकाश महाशाखाले ( ४५.४४ प्रतिशत) खर्च गरेको छ । सो महाशाखामा रहेको कूल १० करोड २२ लाख ७१ हजार बजेटमध्ये ४ करोड ६४ लाख ७१ हजार रकम खर्च भएको उनले जानकारी दिए । पूर्वाधारतर्फको बजेट भने ४८.१ प्रतिशत खर्च भएको छ । कूल बजेट २ अर्ब ६८ करोड ७७ लाख ६८ हजारमध्ये १ अर्ब २९ करोड, २७ लाख ४५ हजार रकम खर्च भएको पौडेलले बताए ।
राजश्व संकलनमा पनि महानगरले लक्ष्य भेट्टाएको छैन । गत आर्थिक वर्षमा करिब २६ करोड अनुमान गरिएको सम्पत्ति कर जम्मा ७ करोडमात्र उठेको छ । महानगरले ३५ करोड राजश्वको लक्ष्य राखेको ढुंगाm गिट्टी र बालुवा करबाट २१ करोड ८० लाख संकलन गरेको छ ।
पोखरा महानगरका प्रमुख प्रशासकीय अधिकृत महेश बरालले निर्माण सामाग्रीको अभाव, कामदारको अभाव तथा कोरोना महामारीका कारण योजना अनुरुपका कामहरु गर्न नसकिएको स्वीकारे । महानगरका वरिष्ठ प्रशासकीय अधिकृत एवं सूचना अधिकारी भरतराज पौडेलले कोरोना महामारीको विषम अवस्थामा समेत महानगरबासीको सेवामा कुनै कसर बाँकी नराखिएको जिकिर गरे । पोखरा महानगरका सहरी योजना आयोगका उपाध्यक्ष डा. आरसी लामिछानेको अध्यक्षतामा भएको सो कार्यक्रममा प्रवक्ता धनबहादुर नेपालीले स्वागत मन्तव्य व्यक्त गरे ।
