बालकोटमा जारी कांग्रेस-एमालेको शीर्ष नेताबीचको बैठक सकिएको छ ।
बैठक बिनानिष्कर्ष टुंगिएको सञ्चार तथा सूचना प्रविधि मन्त्री एवं कांग्रेस नेता ज्ञानेन्द्रबहादुर कार्कीले बताए । हिजो जुन कुरा भएको थियो आज पनि त्यही कुरा भएको उनले बताए ।
‘हामीले उहाँहरूलाई संसद सुचारू गरौं । एमसिसीलाई राष्ट्रिय सहमितका साथ अनुमोदनको दिशामा लगेर मुलुक महत्वपूर्ण विषयमा एक ठाउँमा उभिन्छ भन्ने सन्देश दिऊँ भनेर प्रस्ताव गर्यौं तर उहाँहरूले पुरानै कुरा दोहोराउनु भएको छ’, छलफल सकिएपछि पत्रकारसँग कार्कीले भने, ‘हामीलाई प्रतिनिधि सभाको द्वार खुलेको छैन। त्यो खुलाउन तपाईंहरूले काम गर्नुस्। तपाईंहरूको दायित्व हो भनेर भन्नुभयो। हामीले पनि तपाईंहरूको पनि दायित्व हो संसद जिवन्त बनाउने। यो दायित्वलाई परिस्थितिको मूल्यांकन गरेर अगाडि बढौं भनेका छौं। र आज पनि छलफल त्यति मै केन्द्रित रह्यो ।’
जुन सकारात्मक कुरा सुनाउला भन्ने लागेको थियो त्यो सुनाउन नपाएको उनले बताए ।
