गण्डकी प्रदेशका मुख्यमन्त्री नियुक्त भएपछि एमाले नेता खगराज अधिकारीले प्रदेशको औचित्य सावित गर्न प्रयास गर्ने बताएका छन् । प्रदेश प्रमुख पृथ्वीमान गुरूङले मुख्यमन्त्री नियुक्त गरेपछि संक्षिप्त प्रतिक्रिया दिँदै अधिकारीले उक्त कुरा बताएका हुन् । ‘समृद्ध गण्डकी बनाउने कोसिसमा स्थानीय र संघीय सरकारमा समन्वय, सहकार्य गर्दै प्रदेशको औचित्य सावित गर्न कोसिस गर्छु,’ उनले भने ।
अधिकारीलाई एमालेका २२, माओवादी केन्द्रका ८, राप्रपाका २ र स्वतन्त्र सांसद जितेर एकीकृत समाजवादी प्रवेश गरेका राजीव गुरूङ ‘दीपक मनाङे’को समर्थन छ । गण्डकी प्रदेशमा ६० जना सांसद रहेकोमा सबभन्दा ठूलो दल नेपाली कांग्रेसको २७ जना सांसद छन् ।
अधिकारीसँगै एमालेकी सीता सुन्दास, माओवादीका हरिबहादुर चुमान र राप्रपाका पञ्चराम गुरुङलाई साथमा लिएर शपथ ग्रहण गरेका हुन् । उनीहरूको मन्त्रालय भने टुंगो लागेको छैन ।
