नेपाली कांग्रेस पर्वतमा पार्टी छोड्नेको लहरनै चलेको छ । मौन रुपमा पार्टी काममा सक्रियता कम गरेर बस्नेको संख्या पनि ठुलो छ । केहि नेताहरूले भने खुलेरै पार्टी परित्याग गरिरहेका छन । कांग्रेस नेता मोहन आचार्यले पनि एक हप्ता अंघि नेपाली कांग्रेस परित्याग गरेको सामाजिक संजालबाट जानकारी गराए । नेता आचार्यले ‘करिब २५ बर्षकाे यात्राबाट विश्राम लिदै फरक यात्राका माध्यमबाट जाेडिने साेचमा ।’ भन्दै संजालमा लेखेका छन ।
यस अंघि १४ औं महाधिवेशनमा सभापति पदका प्रत्यासी उम्मेदवार मिलन सुवेदी, नेपाली कांग्रेस प्रदेश ख पर्वतका सचिव ठाकुर रसाईली लगायत ५० बढी नेताले कांग्रेस छाडे देखी राजनीति तरंगित थियो । नेता मोहन आचार्यको निर्णयले कांग्रेसमा खैलाबैला र थप धक्का दिएको छ ।
नेविसंघ पर्वतको अध्यक्ष हुंदै, नेपाली कांग्रेसको जिल्ला सदस्य र नेविसंघ केन्द्रिय सदस्य भइसकेका नेता आचार्य १४औं महाधिवेशनमा सचिव पदका प्रत्यासी थिए । कांग्रेसको टिम गत राजनीतिमा लिस्ट भन्दा बाहिरबाट स्वतन्त्र रुपमा सचीव पदमा उम्मेदवारी दिएका आचार्य झिनो मतले पराजित भएका थिए ।
नेपाली कांग्रेस फुटेपछि प्रजातान्त्रिक कांग्रेसमा बढी सक्रिय भएर राजनीति गरेका थिए । नेपाली कांग्रेस प्रजातान्त्रिकको सभापति नवराज गुरुङ रहँदा आचार्य गुरुङ निकट रहेर काम गरे । आचार्य एक क्षमतावान सांगठनिक र कुटनैतिक नेताको रुपमा चिनिन्छन । पार्टी एकता भएपछि थप सक्रिय भएर कांग्रेसको राजनीतिमा रहेपनि गुरुङ निकट भएकाले अर्जुन जोशी निकट खेमाले जहिले छेउ लगाइरहेको प्रतिनिधि पात्र हुन । जोशी कांग्रेस पार्टी भित्रको राजनीतिमा प्रभाव राख्छन् ।
नेता आचार्यले पछिल्लो समय जोशी संग निकटता बढाएका थिए । जोशीपनि उनको सक्रियता र काम प्रति प्रभावित नै भएको बताउँथे । तर, उनीहरुको निकटता १४औं महाधिवेशनमै टुट्यो ।
गुरुङको कुरा मानेनन्, जोशीले लिष्टमा राखेनन् ।
१४औं महाधिवेशनमा अर्जुन जोशीले आचार्यलाई सचीवको उम्मेदवार बनाउन चाहेको र सोही अनुसार तयारी गर्न भनेका थिए तर अन्तिम समयमा आएर टिमभित्र पारेनन । उता नवराज गुरुङ निकट टिममा भने मोहन आचार्यलाई सचीवका रुपमा अँगाडी बढाउने प्रस्ताव गर्दा पनि जोशीसंग कुरा भएको र बचन दिइसकेकाले अस्वीकार गरेका थिए । त्यसपछि गुरुङ निकट समुहले सचिवमा अन्य युवाहरूलाई अंगाडी बढाए । उता अन्तिम समयमा आचार्यलाई जोशीले टिममा राखेनन् । आफ्नो चहाना हुँदाहुँदै पनि अरुले नमानेकोले टिममा राख्न नसकेको भनेर जोशी पन्छिएका थिए । प्रचारप्रसार अंगाडी बढिसकेको र सहमति गरेको कुरा टुटेपछि अन्तत आचार्य स्वतन्त्र सचीव पदको उम्मेदवार भएर उँभिएका थिए ।
विद्यार्थी राजनीतिबाट उदाएका आचार्य जिल्लामा सबै उमेरका नेता कार्यकर्तामा राम्रो प्रभाव राख्छन् । पार्टी परित्याग गरे संगै आफु निकट नेता कार्यकर्ताहरु र समर्थक संग आन्तरिक रुपमा छलफल गरिरहेको बताउँछन । लामो समय जिल्लामा सक्रिय राजनीति गरेको र काम गर्न सक्ने भएकाले अन्य पार्टीका नेताहरूले पनि संगै काम गर्न प्रस्ताव गरेको बुझिन्छ । अब आचार्य कुन पार्टीमा समाहित भएर राजनीति गर्छन वा पार्टी परित्याग गर्ने केहि नेताहरू राष्ट्रिय स्वतन्त्र पार्टीमा गए जस्तै उतै समाहित होलान् । त्यो समयले बताउला ।
