गर्मी तथा वर्षायाममा झाडापखाला, हैजालगायत रोगहरू फैलने सम्भावना उच्च हुन्छ । त्यसबाट जोगिनका विभिन्न सावधानी अपनाउन स्वास्थ्य तथा जनसंख्या मन्त्रालयले आग्रह गरेको छ ।
मन्त्रालयअन्तर्गतको राष्ट्रिय स्वास्थ्य शिक्षा, सूचना तथा सञ्चार केन्द्रले झाडापखाला, हैजालगायत पानीजन्य रोगहरूबाट बच्न स्वस्थ व्यवहार अपनाउन सुझाव दिएको छ ।
ध्यान दिनुपर्ने कुराहरु
– उमालेर वा क्लोरिन झोल हालेर शुद्धीकरण गरिएको पानी मात्र पिऔँ ।
– खानेपानीलाई सधैँ सफा भाँडामा ढाकेर राखौँ । सफा भाँडाले मात्र खानेपानी निकालौँ ।
– खानेकुरालाई राम्ररी पकाएर मात्र खाऔँ । सडेगलेको, बासी र झिँगा भन्केका खानेकुरा नखाऔँ । खानेकुरालाई सफा भाँडाले ढाकेर राखौँ ।
– खाना बनाउनुअघि, खाना खानु वा खुवाउनुअघि, दिसापिसाब गरेपछि वा बालबालिकाको दिसा धोएपछि, फोहोर चलाएपछि, घर वा कार्यालय छिर्नुअघि, बाहिरी सामान छोएपछि साबुन पानीले कम्तीमा २० सेकेन्डसम्म मिचीमिची हात धोऔँ ।
– साबुनपानी उपलब्ध नभएमा स्यानिटाइजर प्रयोग गरौँ ।
– दिसा–पिसाब चर्पीमा मात्र गरौँ र बालबालिकाको दिसा–पिसाबलाई पनि चर्पीमा नै फ्याकौँ ।
– झाडापखाला भइहालेमा तुरुन्त पुनर्जलीय झोलसँगै प्रशस्त मात्रामा पोसिलो झोलिलो खानेकुरा खाऔँ ।
हैजा तथा झाडापखालाका लक्षण देखिएमा तुरुन्तै नजिकको स्वास्थ्य संस्थामा सम्पर्क गरौँ ।
